Presidenti ukrainas Volodymyr Zelensky ka qenë shënjestra e një komploti vrasjeje, i cili, sipas autoriteteve të sigurisë në Kiev, ishte planifikuar të realizohej nga një ish-ushtarak polak, aktualisht në pension, i rekrutuar që në kohën e Bashkimit Sovjetik nga shërbimet ruse.
Lajmi është bërë i ditur nga kreu i Shërbimit të Sigurisë së Ukrainës (SBU), gjeneral-lejtnant Vasyl Malyuk, gjatë një takimi të mbyllur me përfaqësues të medias ukrainase.
Sipas Malyuk, atentati do të kryhej në aeroportin Rzeszów-Jasionka në Poloni, një pikë kyçe tranziti për udhëtimet zyrtare të presidentit ukrainas. Skema përfshinte përdorimin e një droni me sistem të drejtuar nga distanca ose të një pushke snajperi.
Sipas burimeve të raportuara nga TSN dhe RBC Ukraina, atentatori i dyshuar, një shtetas polak, kishte ruajtur bindje pro-sovjetike për dekada dhe ishte “magjepsur” nga ideologjia e Moskës. Ai thuhet se u riaktivizua nga shërbimet ruse për të kryer këtë mision.
Plani u zbulua dhe u ndalua në kohë falë një operacioni të përbashkët mes SBU-së dhe shërbimit polak të sigurisë së brendshme (ABW), të cilët vunë nën mbikëqyrje personin e dyshuar dhe penguan realizimin e sulmit.
Zelensky ka qenë objektivi i disa tentativave të deklaruara për atentat që prej fillimit të luftës me Rusinë në shkurt 2022, ndërsa autoritetet ukrainase vazhdojnë të theksojnë se rreziku ndaj jetës së tij mbetet i lartë.
