Një person ende i paidentifikuar ka hyrë me forcë në banesën e vëllezërve Andrew dhe Tristan Tate në Rumani, duke sulmuar me thikë një punëtor ndërtimi që po punonte në garazhin e tyre.
Lajmi u bë i ditur fillimisht nga vetë Andrew Tate përmes rrjeteve sociale, ku deklaroi se “një burrë i çmendur i preu dorën një punëtori”, i cili më pas është dërguar me urgjencë për ndihmë mjekësore.
Sipas burimeve lokale të cituara nga portali Gândul, autori i krimit ishte parë më herët duke u endur pranë banesës së tyre dhe është kthyer disa orë më pas, ku është ndaluar nga sigurimi privat dhe më pas arrestuar nga policia rumune.
Ngjarja ndodh në një kohë të ngarkuar për vëllezërit Tate, të cilët përballen me akuza të rënda penale në Rumani për trafikim njerëzish, përdhunim dhe formim grupi kriminal, të cilat ata i mohojnë kategorikisht.
Ata janë në gjendje të lirë, por nën kontrolle gjyqësore, dhe mund të udhëtojnë vetëm me leje të posaçme.
Në Mbretërinë e Bashkuar, Andrew Tate përballet gjithashtu me 10 akuza të tjera penale, përfshirë përdhunim, trafikim dhe dhunë fizike, ndërsa Tristan me 11 akuza të ngjashme.
Prokuroria britanike ka deklaruar se gjyqet në Rumani duhet të përfundojnë përpara se çështjet në Britani të vazhdojnë.
Përveç kësaj, Andrew Tate është gjithashtu i paditur në një proces civil në Londër nga katër gra, një gjyq që pritet të zhvillohet në vitin 2027.