Seb Ponari, një i ri shqiptar me banim në Angli, ka ndërmarrë një sfidë të jashtëzakonshme fizike, por jo vetëm.
Ai është nisur për të përshkuar me vrap një distancë prej 2,750 kilometrash nga Cambridge drejt Tropojës, brenda vetëm 40 ditësh.
Sfida e tij ka nisur më 10 maj dhe për momentin ai ndodhet në Kroaci, ndërkohë që edhe pak ditë e ndajnë nga mbërritja në Shqipëri.
Kjo iniciativë unike e shqiptarit nuk ka si qëllim vetëm tejkalimin e kufijve të durimit njerëzor, por është një thirrje për ndërgjegjësim dhe mbështetje për shëndetin mendor, një temë ende e stigmatizuar në shumë shoqëri, përfshirë edhe atë shqiptare.
“Kjo sfidë është përtej lodhjes fizike – është një mënyrë për të ngritur zërin për ata që vuajnë në heshtje. Dua të mbledh fonde dhe të nxis bisedën për shëndetin mendor, sidomos në komunitetet shqiptare,” – tha Ponari.
Rrugëtimi i Sebit kalon përmes disa vendeve evropiane, dhe çdo ditë ai përshkon mesatarisht mbi 65 kilometra, duke vrapuar për një qëllim që e motivon çdo mëngjes.
Të gjitha fondet e mbledhura gjatë kësaj sfide do të shkojnë për një organizatë lokale që ofron shërbime dhe mbështetje për personat me probleme të shëndetit mendor.
