Presidenti rus Vladimir Putin ka lëshuar një nga sulmet më të fuqishme që nga fillimi i luftës në qytetin verilindor të Ukrainës, Kharkiv.
Mbrëmjen e kaluar, qyteti u përball me një breshëri shpërthimesh të vazhdueshme nga raketa, dronë kamikazë iranianë “Shahed” dhe bomba ajrore drejtuese, të cilat kanë shkaktuar të paktën 3 viktima dhe 21 të plagosur, përfshirë dy fëmijë.
Guvernatori rajonal, Oleg Synegubov, konfirmoi se dëmet materiale janë të mëdha, ndërsa kryetari i bashkisë së Kharkiv-it, Ihor Terekhov, deklaroi se:
“Kharkiv po përjeton sulmin më të fuqishëm që nga nisja e luftës në shkallë të plotë. Brenda vetëm një ore e gjysmë janë dëgjuar mbi 40 shpërthime.”
Sipas të dhënave paraprake, forcat ruse kanë përdorur 48 dronë “Shahed”, dy raketa dhe katër bomba ajrore drejtuese gjatë këtij operacioni.
Sulmi ka dëmtuar rëndë 18 ndërtesa banimi dhe 13 shtëpi private. Tym dhe zjarr vijojnë të përfshijnë disa zona të qytetit edhe orë pas sulmit, ndërsa ekipet e kërkim-shpëtimit po punojnë për të nxjerrë njerëzit që mund të kenë mbetur nën rrënoja.
Ndërkohë, edhe në qytetin jugor të Kherson-it, një çift humbi jetën nga bombardimet, të cilat shkaktuan dëme të mëdha në dy pallate.
Sulme janë raportuar gjithashtu në Dnipropetrovsk, Odesa dhe Ternopil, teksa bilanci i përgjithshëm në 24 orët e fundit tregon të paktën 6 të vdekur dhe 80 të plagosur, përfshirë edhe 3 punonjës emergjence në Kiev.
Presidenti ukrainas Volodymyr Zelensky njoftoi se forcat ruse kanë lëshuar mbi 400 dronë dhe 40 raketa vetëm në një ditë, ndërsa vlerësoi përpjekjet e shërbimeve të emergjencës dhe u kërkoi aleatëve ndërkombëtarë të rrisin ndihmën ushtarake.
