Një variant i ri i koronavirusit, i quajtur HKU5-CoV-2, është zbuluar në Kinë dhe, sipas studiuesve amerikanë, mund të jetë vetëm një “mutacion i vogël” larg nga infektimi i njeriut – duke ndezur alarmet për rrezikun e një pandemie të re.
Virusi është i ngjashëm me MERS-CoV, një tjetër koronavirus vdekjeprurës me shkallë fataliteti deri në 34%, dhe është dokumentuar fillimisht në lakuriqët e natës nga një laborator kinez, i njëjti që dyshohet si burim i COVID-19.
Studiuesit nga Universiteti Shtetëror i Uashingtonit, në një artikull të publikuar në Nature Communications, shpjegojnë se ky virus i ri është pjesë e grupit merbecovirus, ku përfshihet edhe MERS.
Ata përdorën një sërë mjetesh – nga testime me viruse të gjallë e deri te modelimi me inteligjencë artificiale – për të vlerësuar potencialin e virusit për të infektuar qelizat njerëzore.
Profesori i virologjisë, Michael Letko, theksoi se:
“HKU5 është anashkaluar prej vitesh, por tani po kuptojmë që mund të jetë afër të bëhet i transmetueshëm te njerëzit.”
Eksperimentet laboratorike zbuluan se proteina spike e virusit, që është thelbësore për infektimin e qelizave, është shumë pranë aftësisë për t’u lidhur me receptorin ACE2 – i njëjti receptor që përdor edhe SARS-CoV-2 për të infektuar njerëzit. Disa variante të HKU5, veçanërisht Lineage 2, tashmë e kanë këtë aftësi.
Virusi u testua në mënyrë të kontrolluar me “pseudoviruse” – grimca të krijuara në laborator që imitojnë virusin pa qenë infektive. Këto pseudoviruse arritën të hyjnë në qeliza të lakuriqëve me lehtësi, por në disa raste, me mutacione të caktuara, edhe në qeliza njerëzore.
Ekspertët paralajmërojnë se nëse HKU5 kalon te një kafshë ndërmjetëse – si minkët apo civetët – mund të fitojë mutacione që i japin atij mundësinë të përhapet te njerëzit.
Sfondi i shqetësimeve shtohet nga fakti që HKU5 u identifikua për herë të parë nga një ekip kinez në vitin 2005 në lakuriqët japonezë të natës (Pipistrellus abramus), dhe se laboratorët në Wuhan kishin qenë të angazhuar në kërkime të ngjashme me koronavirusë para pandemisë së COVID-19.
Studiuesit përdorën edhe krio-elektron mikroskopinë, për të zbuluar që disa pjesë kyçe të proteinës spike ndodhen ende në pozicion të “mbyllur” – çka e bën infektimin më të vështirë, por jo të pamundur.
“Duke qenë se janë aq të ngjashëm me MERS, duhet të jemi të përgatitur. Ende nuk ka prova që virusi ka kaluar te njerëzit, por potenciali ekziston dhe është i shqetësueshëm”, tha Letko.
Çfarë është HKU5-CoV-2?
- Një virus i zbuluar në lakuriqë në Kinë.
- Pjesë e të njëjtit grup me MERS, me rrezik të lartë fataliteti.
- Ka aftësi të pjesëshme për t’u lidhur me receptorin ACE2 në qelizat njerëzore.
- Mutacionet e mundshme mund ta bëjnë të aftë për përhapje te njerëzit.
