Stadiumi Kombëtar në Tiranë do të mbajë sërish emrin “Air Albania Stadium”, pas një marrëveshjeje të re pesëvjeçare të nënshkruar mes Federatës Shqiptare të Futbollit dhe kompanisë ajrore Air Albania.
Njoftimi u bë publik nga FSHF, e cila theksoi se partneriteti i ri konsolidon bashkëpunimin me një markë kombëtare që ka qenë pjesë e stadiumit që prej inaugurimit të tij në vitin 2019.
Presidenti i FSHF-së, Armand Duka, u shpreh se emri “Air Albania” është më shumë se një emërtim tregtar:
“Ai përfaqëson një filozofi moderne ku sporti, ekonomia dhe identiteti kombëtar ecin bashkë. Ky bashkëpunim tregon se marketingu sportiv në Shqipëri ka hapësirë për modele të qëndrueshme.”
Nga ana tjetër, administratori i kompanisë Air Albania, Sinan Isik, e quajti rinovimin e marrëveshjes një hap strategjik që forcon rolin e kompanisë në jetën sportive dhe shoqërore të vendit:
“Ky partneritet tregon përkushtimin tonë për të qenë më shumë se një kompani transporti – për të qenë pjesë aktive e zhvillimit të vendit.”
