Detaje të reja janë zbuluar nga hetimet për incidentin mes Joz Markut dhe Edi Kuçit, pamjet e të cilit kanë qarkulluar gjerësisht në rrjet gjatë ditëve të fundit.
Sipas Top Channel, nga veprimet e deritanishme hetimore është përcaktuar se ngjarja ka ndodhur në Tiranë, në zonën e mbikalimit të Rinasit. Policia ka sekuestruar edhe pamjet e kamerave të sigurisë në zonë, ndërsa po punohet për identifikimin e të gjithë personave të përfshirë.
Një tjetër detaj që po hetohet lidhet me mënyrën se si është ndaluar automjeti i Edi Kuçit. Sipas raportimit, në pamje shfaqen persona që i bëjnë shenjë Edit të ndalojë “McLaren”-in duke përdorur një tabelë të Policisë së Shtetit. Më pas ai nxirret nga automjeti dhe ndodh përplasja fizike.
Pikërisht përdorimi i kësaj tabele, së bashku me pamjet e publikuara në rrjet, ka bërë që Policia e Tiranës të nisë veprimet hetimore dhe procedurale për të rindërtuar dinamikën e plotë të ngjarjes.
Në kuadër të hetimeve, Jozefin Marku është shoqëruar në polici, ndërsa bashkë me të është shoqëruar edhe një person tjetër që dyshohet se ka qenë i përfshirë në incident. Identiteti i personit të dytë nuk është bërë publik në raportimet e deritanishme.
Hetimet vijojnë, ndërsa pamjet e kamerave të sigurisë pritet të ndihmojnë autoritetet për të përcaktuar rolin e secilit prej personave që shfaqen në video. Shoqërimi dhe hetimi i personave të përfshirë nuk nënkupton përcaktim të fajësisë, e cila vendoset nga organet kompetente.
