Një raport i ri i publikuar nga Agjencia Ndërkombëtare për Energjinë Atomike më 12 qershor ka rikthyer shqetësimin ndërkombëtar për programin bërthamor të Iranit, në një moment kur tensionet në Lindjen e Mesme janë përshkallëzuar ndjeshëm pas sulmeve të fundit izraelite ndaj objektivave iraniane.
Sipas ANEA-së, Irani ka akumuluar rreth 400 kilogramë uranium të pasuruar në nivelin 60%, një përqindje që teknologjikisht e afron materialin me nivelin e nevojshëm për prodhimin e një arme bërthamore. Agjencia thekson se pavarësisht nivelit të lartë të pasurimit, aktualisht nuk ka prova që Irani po ndërton një bombë
Deklaratat politike që pasuan nuk munguan. Presidenti amerikan Donald Trump reagoi menjëherë duke thënë: “Nuk më intereson çfarë thonë shërbimet sekrete. Irani është shumë pranë bombës.”
Komenti i Trump bie ndesh me vlerësimet e fundit nga shërbimet amerikane të inteligjencës, të cilat sugjerojnë se Teherani është të paktën tre vite larg zhvillimit të një arme bërthamore.
Vetëm një ditë pas publikimit të raportit, Izraeli ndërmori një ofensivë ajrore ndaj disa objektivave të konsideruara si pjesë e infrastrukturës bërthamore të Iranit. Zyrtarët izraelitë e justifikuan sulmin si një akt vetëmbrojtjeje përballë, sipas tyre, një kërcënimi konkret dhe të afërt.
Në reagim, Irani e akuzoi drejtpërdrejt ANEA-në për politizim të raportit dhe shtrembërim të të dhënave teknike, duke e quajtur dokumentin një “justifikim për luftë” dhe një mjet për të legjitimuar sulmet ajrore të Izraelit.
