Forcat Ajrore Finlandeze kanë zhvilluar një stërvitje të pazakontë dhe simbolike në autostradën E75 pranë Tikakoskit, ku avionët luftarakë F/A-18 Hornet u ngritën dhe u ulën në një pistë të improvizuar, zakonisht të përdorur për qarkullimin civil.
Ushtrimi, i koduar Baana 25, zgjati tre ditë dhe kishte për qëllim demonstrimin e gatishmërisë dhe fleksibilitetit të forcave ajrore në rast krizash ose konflikti të hapur.
Kjo manovër e jashtëzakonshme vjen në një kohë tensionesh të rritura me Rusinë dhe pas anëtarësimit të Finlandës në NATO në vitin 2023.
Në stërvitje morën pjesë edhe avionë F-35A nga Holanda, duke e kthyer ushtrimin në një demonstrim të bashkëpunimit të ngushtë me aleatët e Aleancës.
Finlanda është e njohur për strategjinë e saj të mbrojtjes së shpërndarë, që përfshin përdorimin e rrugëve dhe pistave alternative për të garantuar vazhdimësinë e operacioneve ajrore në rast se bazat ushtarake konvencionale shënjestrohen nga raketat apo sulmet ajrore.
Përvoja e luftës në Ukrainë ka nxjerrë në pah rëndësinë e këtyre masave, pasi shumë avionë janë shkatërruar ndërsa ndodheshin në pista të ekspozuara.
Avionët F/A-18 që përbëjnë aktualisht shtyllën kurrizore të forcave ajrore të Finlandës pritet të zëvendësohen nga deri në 64 njësi të modelit më të avancuar F-35 Lightning II, me dërgesat që nisin në vitin 2026. Këto mjete do të ofrojnë një modernizim të plotë të kapaciteteve ajrore finlandeze.
Stërvitje të ngjashme janë zhvilluar vitin e kaluar edhe nga SHBA dhe Gjermania në tokën finlandeze, si dhe nga Zvicra, vend neutral, që ka filluar të praktikojë ulje e ngritje të avionëve në autostrada për të kompensuar mungesën e bazave të shumta ajrore.
Ky zhvillim dërgon një sinjal të qartë për gadishmërinë ushtarake të Finlandës dhe përshtatshmërinë e saj në strategjinë më të gjerë të NATO-s për mbrojtje të avancuar në Europën Veriore.
