Presidenti amerikan Donald Trump ka kërcënuar me përdorimin e “armëve më të fuqishme dhe më vdekjeprurëse që janë ndërtuar ndonjëherë”, nëse Rusia përmbush deklaratën e zyrtarit të saj për furnizimin e Iranit me koka bërthamore.
Deklarata e Trump u bë vetëm dy ditë pas sulmeve ajrore të Shteteve të Bashkuara mbi objektet bërthamore të Iranit.
Në një postim në platformën e tij Truth Social, ai reagoi ndaj një deklarate të Dmitry Medvedev, zëvendëskryetarit të Këshillit të Sigurisë së Rusisë, i cili tha se disa vende janë gati t’i japin Iranit kokat e tyre bërthamore.
“E kam dëgjuar vërtet Medvedevin të flasë kaq lehtë për ‘fjalën N’ (Nuclear)? A tha me të vërtetë se Rusia dhe vende të tjera do t’i jepnin armë bërthamore Iranit? Nëse po, më njoftoni menjëherë,” shkroi Trump, duke shtuar se “fjala ‘bërthamore’ nuk duhet përdorur me lehtësi”.
Ai përforcoi mesazhin duke lavdëruar sulmet ajrore amerikane të fundjavës, ku sipas tij u përdorën bomba të sofistikuara për të goditur objektin bërthamor në Fordow.
Trump theksoi se fuqia e vërtetë e SHBA-së qëndron tek nëndetëset bërthamore, duke i quajtur “armët më të fuqishme dhe më vdekjeprurëse të ndërtuara ndonjëherë”.
Sipas tij, nëndetëset kanë lëshuar 30 raketa Tomahawk dhe “të gjitha goditën objektivat në mënyrë perfekte”.
