Një tatuazh për të mos harruar kurrë dy jetët e humbura në ujërat e lumit Arachthos është kthyer në pikë polemike në Greqi.
Ledian Goga, shqiptari që u hodh në lumë për të shpëtuar dy fëmijë që përfunduan në thellësi, vendosi të mbante në trup një kujtim të përhershëm të ngjarjes tragjike: një tatuazh me portretet e fëmijëve.
Mirëpo tattoo artisti që realizoi këtë vepër, Fotis Karkasinas, deklaroi për mediat greke se është sulmuar publikisht nga një emision televiziv, duke u akuzuar se e bëri tatuazhin për përfitim personal dhe reklamë.
“Skena ishte shumë e rëndë emocionalisht. Kur bën tatuazhe të tilla, e ndjen gjithë barrën emocionale. Goga më tregoi çfarë donte, gjetëm së bashku foton që është shpërndarë kudo. Ishte një moment shumë i fortë”, tha artisti.
Por më pas, sipas tij, ndodhi ajo që nuk e priste:
“Dola në një tjetër emision, dhe një gazetar më sulmoi. Nuk kishte bërë asnjë kërkim përpara se të fliste. Nuk e pa çfarë ka ndodhur vërtet dhe nuk më respektoi. Tha se nuk i pëlqeu tatuazhi, dhe se sipas tij e bëmë për reklamë”.
Karkasinas mohoi çdo qëllim të tillë dhe theksoi se e vetmja arsye pse e realizoi tatuazhin ishte dëshira e sinqertë e Gogës për të mbajtur një kujtim të përjetshëm për dy fëmijët që nuk mundi dot t’i shpëtonte. /Lokimagazine.com
