Pas akuzave publike nga autorët e një kënge të vjetër për përdorim pa leje të muzikës së tyre (lexo më shumë këtu), këngëtari Luiz Ejlli ka reaguar përmes një videoje në rrjetin social Instagram, duke sqaruar versionin e tij të ngjarjes.
Në Instastory, Ejlli deklaron se nuk ka kopjuar apo përvetësuar krijimtarinë e askujt, por thjesht ka përdorur një bazë muzikore të vjetër, mbi të cilën ka shkruar një tekst të ri me elemente humori dhe sarkazme.
“Kam marrë një bazë muzikore të vjetër, e kam shkruar vetë tekstin me humorin tim, me sarkazëm, dhe kam guxuar ta postoj në Instagram pa bërë tri minuta heshtje për autorët origjinalë që janë prekur shumë,” tha ai me ironi.
Më tej, Luizi vijon duke theksuar se nuk ka pasur qëllim të fyejë askënd, por ironizon faktin që humori i tij “ka nevojë për leje kalimi”. Ai shton: “Më falni që s’ju kam vendosur titrat si në film, nuk e kam ditur që humori im ka nevojë për leje kalimi. Mos u shqetësoni, herën tjetër kam me ju përmend me emër, mbiemër, NIPT, numër llogarie dhe grup gjaku.”
