Luiz Ejlli vendosi t’i japë fund në mënyrë kreative thashethemeve të fundit që kanë qarkulluar në rrjetet sociale, sipas të cilave bashkëshortja e tij, Kiara Tito, mund të ishte sërish shtatzënë.
Këngëtari publikoi një videoklip të shkurtër me elemente folklorike, ku shfaqej së bashku me Kiarën dhe vajzën e tyre të vogël, Luna Mari.
Përmes kësaj videoje, Luizi mohoi në mënyrë të drejtpërdrejtë dhe me autoironi lajmet për një fëmijë të dytë në ardhje.
Materiali u prit me interes nga publiku dhe u shpërnda gjerësisht në rrjet, falë mënyrës së veçantë dhe argëtuese me të cilën çifti vendosi të adresojë thashethemet.
Megjithatë, pas publikimit të videos, ka pasur reagime nga komuniteti artistik, konkretisht nga kompozitori Driton Fazliu.
Në një postim në Facebook, ai tha se melodia dhe orkestrimi i përdorur në këtë klip janë marrë nga një këngë ekzistuese, për të cilën autor i melodisë është Milaim Mezini, ndërsa orkestrimi është realizuar nga M&D Studio – përkatësisht nga Muhamet Selimi dhe vetë Fazliu.
Fazliu shprehu keqardhje që në videon e Luizit nuk janë përmendur autorët origjinalë të veprës, duke theksuar rëndësinë e ruajtjes së vlerave folklorike përmes respektit ndaj krijuesve.
“Një sqarim për të gjithë dashamirët e muzikës folklorike! Sot e dëgjova një këngë folklorike nga këngëtari i njohur i muzikës së lehtë Luiz Ejlli dhe më bëri përshtypje, sepse traditat tona vetëm në këtë mënyrë ruhen dhe kultivohen. Deri këtu jemi në rregull! Por çdoherë ekziston “por”, me këtë rast këngëtari Luiz Ejlli e ka marrë melodinë dhe orkestrimin komplet të një kënge melodinë e së cilës e ka bërë Milaim Mezini ndërsa është orkestruar nga M&D studio, Muhamet Selimi e Driton Fazliu!
Se populli ynë ka nevojë të kuktivohet folklori kjo ështëe sigurtë si bukën që e hamë, por do të ishte e rrugës që nga këngëtari Luiz Ejlli të paktën të cekej se nga rrjedh melodia dhe ai orkestrim”, shkroi ai.
Deri më tani, nuk ka pasur një reagim publik nga Luizi në lidhje me këtë koment.
