Një ngjarje tronditëse ka shokuar opinionin publik në SHBA, pasi tre vajza të mitura – Paityn (9), Evelyn (8) dhe Olivia Decker (5) – u gjetën të pajeta në një kamp në Leavenworth, Uashington, vetëm pak ditë pasi ishin marrë për vizitë nga babai i tyre, Travis Decker.
Ai tani është në arrati dhe i kërkuar nga autoritetet për vrasjen e vajzave të tij.
Para se tragjedia të ndodhte, nëna e vajzave, Whitney Decker, ndau një video emocionale për Ditën e Babait ku shfaqeshin foto të fëmijëve me babanë e tyre.
Videoja 20-sekondëshe, e realizuar me këngën “Happy” të Pharrell Williams në sfond, u bë publike nga avokatja e saj, Arianna Cozart, dhe përbën një kujtim të dhimbshëm të çastit para ngjarjes fatale.
Sipas autoriteteve, trupat e vajzave u gjetën me duart të lidhura me zipa plastike dhe të mbytura me qese plastike, rreth 20 milje larg shtëpisë së tyre. Mjeti i Travis u gjet në kamp, me dy gjurmë gjaku në bagazh dhe sende personale të vajzave brenda. Ndërkohë, nga Decker nuk ka asnjë gjurmë që prej zhdukjes.
Nëna e vajzave pretendon se tragjedia mund të ishte shmangur nëse autoritetet do kishin vepruar më herët.
Ajo kishte paralajmëruar për gjendjen e rënduar mendore të ish-bashkëshortit të saj, i cili vuante nga PTSD kompleks dhe çrregullime të tjera mendore.
Në dokumentet e divorcit të shtatorit, Whitney kishte ngritur shqetësime për mënyrën e jetesës së Decker dhe për mungesën e kushteve të përshtatshme për qëndrimin e vajzave me të.
Pavarësisht kësaj, ajo kishte theksuar se ai kishte dashuri për vajzat dhe se nuk kishte ndodhur kurrë më parë që të mos i kthente pas vizitës.
Autoritetet kanë lëshuar urdhër arresti për Travis Decker dhe po vazhdojnë kërkimet në zonat pyjore ku dyshohet se mund të jetë strehuar.
