Ajo është emri më i përfolur pas prapaskenave të divorceve më të bujshme në botën e famës — dhe nëse është dikush që e njeh mirë arsyen pse martesat marrin fund, ajo është Laura Wasser.
Avokatja e njohur amerikane, me klientë si Kim Kardashian, Britney Spears, Johnny Depp apo Ariana Grande, ka dekada përvojë në fushën ligjore të familjes dhe një gjë e ka të qartë: fama nuk të mbron nga dhimbja e një ndarjeje.
“Njerëzit kalojnë të njëjtën frikë dhe dhembje zemre,” thotë ajo, duke theksuar se në thelb, ndarjet e VIP-ave janë po aq njerëzore sa ato të çdo çifti tjetër — me përjashtim të pasurive marramendëse që ndahen në mes.
Sipas saj, arsyeja më themelore që çon çiftet në divorc është mungesa e komunikimit. “Mund të jetë një lidhje jashtëmartesore, probleme me alkoolin apo thjesht paaftësia për të komunikuar përballë sfidave. Por në thelb, çiftet ndahen sepse nuk dinë ose nuk guxojnë të flasin me njëri-tjetrin,” – shprehet Wasser.
Për këtë arsye, ajo këshillon që çdo çift të hapë temat e mëdha para se të thotë “Po”. Nga mënyra se si do të rrisin fëmijët, tek raporti me familjen e zgjeruar, nga planet financiare deri tek ndarjet e përgjegjësive — çdo diskutim është më mirë të ndodhë në paqe sesa në gjykatë.
“Komunikimi i mirë nuk është një luks në martesë, është mbijetesa e saj,” thotë Wasser. Dhe sipas saj, zakonin e komunikimit nuk e krijon vetëm dashuria, por guximi për të bërë biseda të vështira që në fillim.
Në një kohë kur duket se martesat e yjeve nuk zgjasin më shumë se një sezon televiziv, këshilla e një avokate që ka parë gjithçka nga afër, vlen për këdo — të famshëm apo jo.
