Një ngjarje e rëndë ka tronditur komunitetin e Dawson County, Nebraska, më 10 maj, kur autoritetet gjetën pa shenja jete katër anëtarë të së njëjtës familje në banesën e tyre.
Sipas Policisë Shtetërore të Nebraskës, dyshohet se babai i familjes, Jeremy Koch, 42 vjeç, i ka marrë jetën bashkëshortes së tij, Bailey, 41 vjeç, dhe dy djemve të tyre Hudson, 18 vjeç, dhe Asher, 16 vjeç, para se të vetëdëmtohej për vdekje.
Ngjarja ndodhi në të njëjtën ditë që Hudson pritej të diplomohej nga shkolla e mesme.
Të katër personat u gjetën me plagë fatale të shkaktuara nga armë e ftohtë, e cila u gjet në vendngjarje.
Ngjarja e rëndë ka lënë gjurmë të thella në komunitet. Gjatë ceremonisë së diplomimit, drejtori i shkollës, Dan Endorf, tha:
“Emocionet e hidhura të kësaj dite tregojnë sa e papritur dhe e vështirë mund të jetë jeta që këta të rinj po nisin. Le të nderojmë rrugëtimin e tyre dhe të kujtojmë se çdo hap përpara është një fitore ndaj dhimbjes.”
Në një reagim publik, prindërit e Bailey shprehën trishtimin e thellë dhe zhgënjimin për mungesën e mbështetjes ndaj shëndetit mendor në vend. Ata treguan se Koch kishte vite që përballej me sfida të mëdha psikologjike, të dokumentuara që nga viti 2009, përfshirë përpjekje të shumta për vetëvrasje.
Bailey, e cila ishte edhe autore dhe aktiviste në rrjetet sociale për ndërgjegjësimin mbi shëndetin mendor, kishte ndarë hapur betejën e bashkëshortit të saj, duke i bërë thirrje publikut të hapë sytë ndaj krizës së shëndetit mendor.
Hetimet mbi këtë tragjedi të thellë vazhdojnë, ndërsa komuniteti është i tronditur dhe në zi për humbjen e katër jetëve të pafajshme.
