Ngjarja e rëndë që tronditi opinionin publik sot në Prishtinë ka marrë një tjetër dimension pas identifikimit të autorit.
Burri që plagosi rëndë bashkëshorten e tij dhe më pas i dha fund jetës është stilisti i njohur shqiptar, Festim Isufi.
Festim Isufi ishte një nga emrat më të spikatur në industrinë e modës në Kosovë dhe jo vetëm.
Ai u bë i njohur si dizajneri i parë shqiptar që prezantoi koleksionin e tij “Haute Couture” në Javën e Modës në Paris, në ambientet luksoze të Ritz Paris – në të njëjtën hapësirë ku kanë parakaluar koleksione të dizajnerëve më të famshëm botërorë.
Ngjarja nisi në afërsi të një klinike dentare në Prishtinë, ku Isufi dyshohet se goditi me thikë bashkëshorten e tij, një TikTok-ere e njohur. Pas sulmit, ai u largua drejt banesës së tij në rrugën “B”, ku më vonë u gjet pa shenja jete.
Policia konfirmoi se 34-vjeçari kishte ndërruar jetë si pasojë e plagëve të marra nga vetë, ndërsa bashkëshortja e tij, 30 vjeç, ndodhet nën kujdesin e mjekëve.
Mbetet ende e paqartë arsyeja që çoi në këtë akt të rëndë, ndërsa hetimet vazhdojnë.
