Këngëtarja e njohur me origjinë shqiptare, Bebe Rexha, ka ndarë publikisht një nga momentet më të vështira të jetës së saj.
Më 6 maj, artistja zbuloi se kishte përjetuar një humbje shtatzënie, pas valës së komenteve fyese rreth peshës së saj që pasuan paraqitjen në Met Gala 2025.
Në një postim në platformën X (ish-Twitter), i cili më pas është fshirë, Rexha tregoi se po përballet me sindromën e vezores policistike (PCOS), një gjendje shëndetësore që e ka vështirësuar procesin e shtatzënisë dhe ka ndikuar në ndryshimet e saj trupore.
“U bëra shtatzënë, por nuk funksionoi, dhe unë e kam mbajtur këtë dhimbje në heshtje,” shkroi ajo. Bebe shtoi se, edhe pse nuk i detyrohet askujt shpjegime për trupin e saj, vendosi të flasë për t’u treguar njerëzve sa e rëndësishme është të kenë kujdes me komentet që bëjnë për dikë tjetër.
Këngëtarja nuk dha detaje të tjera mbi kohën kur ndodhi humbja ose për identitetin e partnerit, ndërsa theksoi se polemikat e krijuara rreth peshës së saj u bënë arsyeja kryesore që ajo vendosi të hapet lidhur me betejat personale që po kalon.
Bebe Rexha ka folur edhe më parë për sindromën e vezores policistike, duke shpjeguar se kjo gjendje i ka sjellë ndryshime të konsiderueshme në peshë dhe ka ndikuar në mirëqenien e saj emocionale.
Reagimet nga fansat dhe figura publike nuk kanë munguar, duke i dhënë asaj mbështetje të madhe për guximin dhe hapjen e sinqertë ndaj një çështjeje kaq të ndjeshme.
