Këngëtarja e njohur Ariana Grande dhe aktori Ethan Slater i kanë dhënë fund marrëdhënies së tyre romantike pas një periudhe trevjeçare bashkëjetese dhe lidhjeje.
Lajmi është konfirmuar nga burime të afërta me ish-çiftin për mediat amerikane, duke saktësuar se vendimi për ndarjen është marrë përpara disa muajsh në mënyrë të qetë dhe pa rënë në sy të publikut.
Aktualisht, Ariana Grande është e përqendruar në angazhimet e saj profesionale, të cilat përfshijnë menaxhimin e turneut të saj më të ri muzikor të titulluar “Eternal Sunshine” si dhe përgatitjet për publikimin e albumit të ri studior “Petal”.
Ky projekt muzikor pritet të dalë në treg më 31 korrik, ndërsa raportohet se këngët e reja nuk kanë lidhje apo frymëzim nga ndarja e fundit.
Lidhja mes 32-vjeçares Grande dhe 34-vjeçarit Slater nisi gjatë xhirimeve të projektit kinematografik “Wicked”.
Në periudhën kur filluan raportet mes tyre, të dy artistët ishin në procese përmbylljeje të martesave të tyre të mëparshme; këngëtarja ishte e martuar me Dalton Gomez, ndërsa aktori me Lilly Jay, me të cilën ka edhe një djalë të quajtur Ezra.
Fillimi i kësaj romance pati sjellë edhe reagime publike nga ish-bashkëshortja e Slater në qershor të vitit 2023. Gjatë asaj periudhe, Lilly Jay u shpreh publikisht: “Ariana është historia e vërtetë këtu. Nuk është vajzë që mbështet vajzat. Familja ime është thjesht dëmi anësor.”
Pavarësisht këtyre deklaratave, njerëz pranë rrethit të ngushtë të çiftit sqaruan se marrëdhënia e re kishte nisur vetëm pasi Ethan Slater kishte ndërprerë zyrtarisht bashkëjetesën me ish-bashkëshorten e tij prej dy muajsh. Përgjatë tre viteve të qëndrimit bashkë, të dy personazhet u përpoqën ta mbanin jetën e tyre private larg vëmendjes së mediave, duke bërë vetëm disa postime të rralla në rrjetet sociale.
Në nisje të turneut të saj në Oakland të Kalifornisë, këngëtarja u shfaq e qetë përballë statusit të saj të ri si beqare, duke bërë edhe disa batuta me jetën e saj të kaluar bashkëshortore gjatë interpretimit të këngës “Thank U, Next”, një projekt që u dedikohet historive të saj të mëparshme me personazhe si Pete Davidson, Big Sean dhe Mac Miller.
