Dyshja e njohur e ish-banorëve të edicionit të katërt të Big Brother VIP Kosova, Elijona dhe Klodi, kanë konfirmuar se kanë nisur një romancë dashurie së bashku.
Lajmi ka tërhequr menjëherë vëmendjen e ndjekësve të tyre, të cilët kishin vënë re afinitetin mes dyshes që gjatë qëndrimit në shtëpinë e spektaklit.
Përgjatë rrugëtimit të tyre të gjatë në këtë format televiziv, kimia dhe pëlqimi mes të dyve ishin mjaft të dukshme për publikun. Megjithatë, në atë kohë, Klodi kishte refuzuar të niste një marrëdhënie romantike me Elijonën brenda shtëpisë, duke u treguar i rezervuar për shkak të një lidhjeje që kishte jashtë programit.
Tashmë, çdo dyshim apo pikëpyetje rreth raportit të tyre është shuar përfundimisht. Dyshja ka zgjedhur të bëjë publike lidhjen e tyre përmes një videoje të ndarë në rrjetet sociale. Në këto pamje, Klodi dhe Elijona shfaqen pranë njëri-tjetrit, mjaft të qeshur dhe duke kërcyer së bashku, duke vulosur kështu nisjen e këtij kapitulli të ri në jetën e tyre private.
