Pesë lojtarë të sportit pickleball kanë humbur jetën si pasojë e rrëzimit të një avioni të përmasave të vogla.
Ngjarja është regjistruar të enjten në një zonë të pyllëzuar pranë Wimberley, në afërsi të Austin, Teksas. Autoritetet vendore raportojnë se mjeti fluturues i tipit Cessna po lëvizte me shpejtësi të lartë në momentin e rënies.
Të dhënat e publikuara nga Amarillo Pickleball Club konfirmojnë identitetet e udhëtarëve: Seren Wilson, Brooke Skypala, Stacy Hedrick, Glen Appling dhe Hayden Dillard, moshat e të cilëve varionin nga adoleshenca deri në mesin e të 40-ave.
Grupi ishte nisur nga Amarillo me një avion Cessna 421C dhe kishte si destinacion Aeroportin Kombëtar të New Braunfels.
Klubi sportiv i ka cilësuar viktimat në një deklaratë zyrtare si: “pesë anëtarë të familjes sonë të pickleball-it në Amarillo.”
Në njoftimin e tyre të së premtes shtohet: “Të pestë mbetën të vrarë mbrëmë në një aksident avioni privat afër Austin, TX, teksa po udhëtonin për në një turne pickleball-i. Ndonëse shumë ishin miq me lojtarët, humbja është më e tmerrshme për familjet e tyre të ngushta,”.
Ekipi i tenisit i gjimnazit Tascosa publikoi gjithashtu një reagim për Seren Wilson, ish-nxënëse e këtij institucioni.
Ekipi shkroi: “Seren ishte shumë më tepër se një ish-nxënëse dhe kampione e shtetit në UIL Team Tennis 2022, ajo ishte një mbështetëse e vazhdueshme e Sandie Tennis dhe dikush që derdhi kaq shumë në këtë program dhe te lojtarët. Seren dashuronte shumë dhe prania, inkurajimi dhe fryma e saj do t’u mungojë thellësisht shumë njerëzve”.
Drejtuesi i klubit të Amarillo, Dan Dyer, i cili kishte zhvilluar disa ndeshje me katër prej pjesëmarrësve, u shpreh për Associated Press: “Unë u kam dhënë atyre medalje. Ata ishin lojtarë të shkëlqyer. Kishin dalë për të fituar disa ndeshje,” duke theksuar më pas dinamikën e këtij sporti: “Çdo fundjavë ka dhjetëra turne. Disa njerëz fiksohen; të tjerë jo. Por sapo ndodh, ata do të udhëtojnë për një turne.”
Lidhur me shkaqet e ngjarjes, Gjyqtari i Qarkut Hays, Ruben Becerra, përjashtoi mundësinë e një incidenti me mjete të tjera duke deklaruar: “Bazuar në gjetjet aktuale, nuk ka asnjë tregues për një përplasje në ajër. Një avion i dytë që udhëtonte në afërsi u ul i sigurt në New Braunfels”.
Përfaqësues të Departamentit të Sigurisë Publike në Teksas theksuan të premten se zjarri që përfshiu mjetin ajror pas rënies: “do të tregonte disa dëmtime mjaft të rënda”.
