Udhëheqësi suprem i Iranit, Ayatollah Ali Khamenei, ka lëshuar një seri paralajmërimesh apokaliptike në kulmin e përshkallëzimit të luftës me Izraelin.
Khamenei publikoi të martën një imazh tronditës ku topa zjarri bien mbi një qytet të lashtë, ndërsa një burrë i armatosur me shpatë sulmon portat e tij.
“Në emër të Haidarit fisnik, beteja fillon,” shkroi ai në gjuhën farsi, duke iu referuar figurës së Aliut, të cilin myslimanët e konsiderojnë imam të parë dhe pasues legjitim të Profetit Muhamed.
Në një tjetër mesazh, këtë herë në anglisht, Khamenei shtoi: “Duhet t’i japim një përgjigje të fuqishme regjimit terrorist sionist. Nuk do të tregojmë mëshirë ndaj sionistëve.”
Njëkohësisht, televizioni shtetëror iranian paralajmëroi një ngjarje të madhe që do të ndodhte “këtë natë, dhe që bota do ta kujtojë për shekuj”.
Në Shtëpinë e Bardhë, Presidenti Trump po zhvillon konsultime intensive me këshilltarët e sigurisë kombëtare. Sipas raportimeve të New York Times, atij i janë paraqitur tre plane ushtarake për ndërhyrjen e mundshme të Shteteve të Bashkuara në shkatërrimin e programit bërthamor iranian.
Opsioni i parë përfshin ofrimin e inteligjencës dhe avionëve për furnizim me karburant gjatë misioneve ajrore izraelite.
I dyti parashikon sulme të përbashkëta amerikano-izraelite mbi objektivat iraniane.
Opsioni i tretë dhe më agresivi do të ishte një fushatë ushtarake e udhëhequr nga SHBA, me përfshirjen e bombarduesve strategjikë B-1 e B-2, raketave lundruese nga nëndetëset dhe avionmbajtëse në Mesdhe.
Ndërkohë, tensionet mbeten në pikën më të lartë, dhe vendimi përfundimtar i Trump pritet të ndikojë në fatin e gjithë rajonit.
