Irani ka ndërmarrë një tjetër sulm të drejtpërdrejtë ndaj Izraelit, duke lëshuar dhjetëra raketa balistike në drejtim të veriut të vendit, me qytetin e Haifës në qendër të sulmit.
Sipas burimeve izraelite, pjesa më e madhe e raketave u neutralizuan nga sistemet e mbrojtjes ajrore, por disa arritën të godasin objektiva në zonat përreth.
Një nga raketat goditi një banesë në qytetin Tamra, pranë Haifës, duke shkaktuar dëme të mëdha materiale dhe duke lënë të paktën 14 persona të plagosur, mes tyre edhe fëmijë.
Një prej të lënduarve raportohet në gjendje të rëndë. Sirenat e alarmit ranë në disa qytete, përfshirë Tel Avivin, ndërsa autoritetet urdhëruan popullsinë të strehohet në ambientet e mbrojtjes civile.
Ministria izraelite e Mbrojtjes konfirmoi se bëhet fjalë për një valë të koordinuar sulmesh nga territori iranian, në vazhdën e përshkallëzimit të tensioneve mes dy vendeve pas sulmeve ajrore të fundit mbi infrastrukturë strategjike në Iran.
Kombet e Bashkuara dhe aktorë të tjerë ndërkombëtarë janë shprehur të shqetësuar për rrezikun e një konflikti të gjerë rajonal dhe kanë bërë thirrje për përmbajtje dhe dialog. Nga ana e tij, Irani e ka konsideruar veprimin si një kundërpërgjigje ndaj “agresionit
Situata në veri të Izraelit mbetet kritike, ndërsa autoritetet izraelite kanë vendosur forcat e mbrojtjes në gatishmëri të lartë për çdo zhvillim të mëtejshëm.
