Një përshkallëzim i rrezikshëm ka shpërthyer në Lindjen e Mesme pasi Izraeli kreu bombardime mbi objekte ushtarake dhe bërthamore në Iran.
Këto sulme, të cilat Izraeli ka paralajmëruar se do të vazhdojnë për ditë të tëra, janë cilësuar nga Irani si “shpallje lufte”.
Në të njëjtën kohë, liderët e dy vendeve kanë dhënë deklarata të ashpra që sugjerojnë përgatitje për konflikt të zgjatur.
Në këtë situatë të tensionuar, lind pyetja: kush ka ushtrinë më të fuqishme?
Numri i ushtarëve
Irani ka një avantazh të dukshëm në numër. Me një popullsi prej rreth 88 milionë banorësh (kundrejt 9.4 milionë të Izraelit), ushtria iraniane ka mbi 600,000 trupa aktive – shumë më tepër se forcat e armatosura izraelite.
Megjithatë, forca nuk vjen vetëm nga numrat.
Buxheti dhe fuqia ekonomike ushtarake
Izraeli shpenzon dyfish më shumë për mbrojtjen: rreth 22 milionë £, krahasuar me 11 milionë £ të Iranit. Kjo diferencë vjen edhe si pasojë e sanksioneve ndërkombëtare ndaj Teheranit. Por Irani mbështetet shumë te ekonomia e brendshme ushtarake – sidomos përmes Gardës Revolucionare, e cila kontrollon një pjesë të madhe të tregut dhe ekonomisë nëntokësore.
Armatimi dhe kapacitetet bërthamore
Izraeli zotëron armë bërthamore që nga vitet 1960 – aktualisht rreth 90 koka bërthamore – ndonëse nuk e pranon zyrtarisht. Ndërsa Irani ka aftësi për t’i prodhuar, por nuk raportohet të ketë asnjë të tillë të konfirmuar. Pikërisht frika nga kjo është një ndër arsyet kryesore të sulmeve izraelite.
Në anën tjetër, Irani ka një arsenal të madh raketash me rreze të mesme dhe të shkurtër veprimi – të afta të godasin lehtësisht territorin izraelit.
Tanket, avionët dhe marina
Në numra, Irani ka më shumë tanke (1,731 kundrejt 1,300 të Izraelit) dhe më shumë automjete të blinduara. Por shumë nga këto mjete janë modele të vjetra dhe teknologjikisht të tejkaluara.
Izraeli ka përparësi të qartë në cilësinë e pajisjeve – me tanke moderne si “Merkava” dhe avionë luftarakë F-15, F-16 dhe F-35, që tejkalojnë fuqinë ajrore të Iranit.
Në det, Irani ka më shumë njësi detare dhe nëndetëse, por asnjë nga dy shtetet nuk ka fuqi të konsiderueshme detare krahasuar me fuqitë botërore.
Gjeografia si faktor vendimtar
Iran dhe Izrael nuk ndajnë kufi tokësor – dhe janë ndarë nga vende si Iraku. Prandaj, çdo konflikt do të zhvillohej përmes ajrit dhe raketave, më shumë se përballje të drejtpërdrejtë tokësore.
Ekspertët thonë se një luftë mes këtyre dy vendeve nuk do të ishte klasike – por një shkëmbim sulmesh në distanca të gjata, ku teknologjia, saktësia dhe aleancat strategjike do të jenë vendimtare.
Pra, Irani ka numrin dhe hapësirën. Izraeli ka teknologjinë dhe aleancat.
Një përplasje mes tyre do të ishte e rrezikshme, jo vetëm për rajonin, por për stabilitetin global.
Situata mbetet jashtëzakonisht e brishtë.
