NASA ka zbuluar një imazh të ri dhe të detajuar të Galaktikës Sombrero – e njohur gjithashtu si Messier 104 (M104) – e cila ndodhet rreth 29.3 milionë vite dritë larg Tokës, në drejtim të konstelacionit të Virgjëreshës (Virgo).
Galaktika ka një strukturë unike dhe të dallueshme, që i ka dhënë emrin “Sombrero”, për shkak të ngjashmërisë me një kapelë me brim të gjerë.
Ajo ka një fryrje të madhe qendrore të mbushur me yje të ndritshëm, e rrethuar nga një disk i hollë me pluhur kozmik që e bën siluetën e saj edhe më të spikatur. Ky pluhur përthith dritën dhe ndihmon në formimin e yjeve të rinj.
Përmasat e Sombreros janë mbresëlënëse: ajo shtrihet në një diametër prej rreth 50,000 vite dritë, që është gati gjysma e përmasës së Rrugës së Qumështit.
Në qendër të galaktikës ndodhet një vrimë e zezë supermasive, me një masë që vlerësohet të jetë rreth një miliard herë më e madhe se ajo e Diellit, gjë që e bën një ndër vrimat e zeza më masive të njohura në galaktikat spirale.
Imazhi i publikuar së fundmi nga NASA është realizuar nëpërmjet të dhënave të kombinuara nga Hubble Space Telescope, Spitzer Space Telescope dhe Chandra X-ray Observatory, duke dhënë një pamje shumë-dimensionale të kësaj galaktike – në dritë të dukshme, infra të kuqe dhe rreze X.
Ky lloj vëzhgimi ndihmon shkencëtarët të kuptojnë më mirë formimin e galaktikave, shpërndarjen e yjeve, si dhe aktivitetin e vrimave të zeza në qendrat e tyre.
