Forcat ruse kanë pretenduar të dielën se për herë të parë kanë depërtuar në rajonin qendror të Dnipropetrovskut në Ukrainë – një zonë që Moska është përpjekur ta arrijë prej muajsh.
Nëse konfirmohet, ky zhvillim mund të krijojë sfida të reja për ushtrinë ukrainase, e cila tashmë është e shpërndarë në disa fronte të nxehta.
Sipas Ministrisë ruse të Mbrojtjes, nënnjësitë e Divizionit të 90-të të tankeve kanë arritur kufirin mes rajonit të Dnipropetrovskut dhe Donetskut (ky i fundit, pjesërisht i pushtuar nga Rusia), dhe më pas kanë hyrë në territorin e Dnipropetrovskut.
CNN nuk ka mundur të verifikojë këto pretendime në mënyrë të pavarur, dhe autoritetet ukrainase nuk kanë konfirmuar avancimin rus. Megjithatë, një hyrje e tillë do të përbënte një humbje strategjike për Kievin në një moment kur bisedimet për paqe janë në ngërç dhe kur Rusia po bën përparime të ngadalta edhe në rajonet e tjera si Sumy dhe Lyman.
Pse është i rëndësishëm Dnipropetrovsk?
Rajoni është strategjik për shkak të pozicionit të tij gjeografik dhe kapaciteteve logjistike e industriale. Përpara luftës, kishte një popullsi prej afro 3 milionë banorësh dhe konsiderohet një zonë kyçe për industrinë minerare dhe transportin.
Ai kufizohet me tre rajone të pushtuara pjesërisht nga Rusia: Donetsk, Kherson dhe Zaporizhzhia – të gjitha në listën e objektivave të shpallura të Moskës për pushtim të plotë. Nëse Rusia arrin të sigurojë një prezencë të qëndrueshme në Dnipropetrovsk, do të përforconte korridorin e saj lindor dhe do të përbënte një kërcënim serioz për rrjetin logjistik ukrainas.
Situata në Pokrovsk dhe Sumy
Ndërkohë, luftimet vazhdojnë të ashpra në drejtim të Pokrovsk, një nyje strategjike që Ukraina është përpjekur të mbrojë prej muajsh. Shtabi i Përgjithshëm ukrainas raportoi se kishte zmbrapsur 65 sulme në këtë drejtim gjatë ditës së diel.
Ndërkohë, në veri, Rusia ka avancuar në rajonin Sumy, duke sjellë kryeqytetin
