Autoritetet amerikane po hetojnë një ngjarje të rëndë që ka tronditur opinionin publik: tre motra të mitura u gjetën të pajeta pranë automjetit të babait të tyre, i cili dyshohet si autor i vrasjes.
Sipas dokumenteve hetimore, trupat e vajzave – Paityn Decker (9 vjeçe), Evelyn Decker (8 vjeçe) dhe Olivia Decker (5 vjeçe) – u zbuluan më 2 qershor me qese plastike në kokë dhe duart e lidhura. Autopsia paraprake tregon se shkaku i vdekjes ishte asfiksia.
Vajzat ishin raportuar të zhdukura që prej së premtes, pas një takimi me babain e tyre, Travis Decker, 32 vjeç. Ai nuk i ktheu në orarin e caktuar dhe për këtë arsye u lëshua urdhër-arrest për shkelje të marrëveshjes së kujdestarisë.
Automjeti i tij u lokalizua më vonë në një zonë të pyllëzuar, ku u gjetën edhe trupat e pajetë. Në mjet u zbuluan edhe gjurmë gjaku. Telefoni i tij rezulton të ketë qenë në të njëjtën zonë gjatë fundjavës.
Travis Decker është në kërkim dhe autoritetet kanë bërë thirrje për ndihmë publike në lokalizimin dhe arrestimin e tij.
