Ditën e djeshme, Vullkani Etna në Siçili përjetoi një shpërthim të fuqishëm dhe të papritur, duke shkaktuar panik mes turistëve dhe udhërrëfyesve që ndodheshin pranë kraterit.
Shpërthimi, i 14-ti që nga mesi i marsit, përfshiu një rrjedhë piroklastike që zbriti rreth 2 kilometra nga krateri jugperëndimor në zonën Valle del Leone, një hapësirë natyrore që ndihmoi në përmbajtjen e lavës.
Sipas raportimeve, shpërthimi filloi pas një periudhe 19-ditore pa aktivitet, me shpërthime eksplozive dhe rrjedha lave në shpatet lindore dhe jugore. Kulmi i ngjarjes ndodhi rreth orës 11:23 të mëngjesit, dhe deri në pasdite, aktiviteti vullkanik ishte zbutur .
Pamjet e publikuara në rrjetet sociale tregojnë turistë që largohen me nxitim nga zona e kraterit, ndërsa re të mëdha hiri dhe gazi ngriheshin në atmosferë.
Megjithatë, autoritetet konfirmuan se nuk pati të lënduar apo evakuime, dhe nuk kishte kërcënim për popullsinë përreth .
Autoritetet lokale kanë bërë thirrje për kujdes të shtuar dhe respektim të udhëzimeve të sigurisë për të gjithë ata që planifikojnë të vizitojnë Etnën në ditët në vijim.
Ndërkohë, Instituti Kombëtar i Gjeofizikës dhe Vullkanologjisë në Itali vazhdon të monitorojë nga afër aktivitetin e vullkanit.
