Një moment i kapur në kamera gjatë mbërritjes së presidentit Emmanuel Macron në Vietnam është bërë viral, duke ngritur pikëpyetje të shumta rreth marrëdhënies së çiftit presidencial.
Pamjet tregojnë Zonjën e Parë, Brigitte Macron, duke shtyrë fytyrën e të shoqit, pak para se ai të zbriste nga avioni presidencial.
Ndërkohë që presidenti u mundua ta justifikojë si një shaka mes bashkëshortësh, ekspertët mendojnë ndryshe.
Judi James, eksperte e njohur e gjuhës së trupit, ka analizuar momentin për Daily Mail dhe ka deklaruar qartë: “Nuk kishte asnjë shaka në këtë veprim.”
Sipas saj, mungesa e ndonjë buzëqeshjeje apo kontakti të ngrohtë pas momentit e bën të qartë që nuk bëhej fjalë për një skenë të lehtë.
“Macron dukej i hutuar dhe preku fytyrën sikur të kontrollonte nëse ishte mirë,” – u shpreh ajo. “Shtytja ishte e fortë dhe aspak e zakonshme për një situatë që do të mund të quhej lojë bashkëshortore.”
Judi James vë në dukje se Brigitte Macron nuk e ndaloi me një veprim të vetëm, por shtytja duket se u përsërit, ndërsa presidenti u përpoq të ruante ekuilibrin.
Pas incidentit, çifti nuk shkëmbyen kontakt fizik dhe ecën përkrah njëri-tjetrit pa ndonjë ndërveprim të dukshëm.
Presidenti e minimizoi situatën duke thënë se “media po e ekzagjeron si një katastrofë gjeo-planetare” dhe se “ishte thjesht një lojë mes tyre”. Por ekspertja e gjuhës së trupit fton në reflektim:
“Nëse do të kishte ndodhur e kundërta dhe ai do ta kishte shtyrë atë, a do ta quanim ende ‘shaka’? Jo. Prandaj nuk duhet ta relativizojmë as në këtë rast.”
