Ndërkohë që populli shqiptar pret rezultatet përfundimtare të zgjedhjeve, një gafë e Komisionit Qendror të Zgjedhjeve ka ndezur rrjetin dhe ka shtuar dyshimet për transparencën e procesit.
Çfarë ndodhi?
Në faqen zyrtare të përditësimit të rezultateve, KQZ ka raportuar se janë numëruar 43,773 zarfa nga vota e diasporës, ndërkohë që vetë institucioni kishte deklaruar më herët se numri total i zarfeve të ardhura ishte 42,402.
Pra, janë “numëruar” 1,371 zarfa më shumë sesa ekzistojnë realisht — një lapsus që në çdo kontekst do të konsiderohej i rëndë, por në klimën aktuale zgjedhore është parë si provë për një skemë të mundshme mashtrimi.
Platformat sociale janë përfshirë nga komente të indinjuara, duke akuzuar KQZ për papërgjegjshmëri, mashtrim, apo edhe manipulim të mundshëm të votave.
Një pjesë e qytetarëve kërkojnë shpjegime të menjëhershme dhe hetim të plotë, veçanërisht duke pasur parasysh që për votën e diasporës janë shpenzuar 9.3 milionë euro nga buxheti i shtetit, dhe kjo votë ishte ndër më të diskutuaret gjatë gjithë fushatës.
KQZ ende pa reagim zyrtar, ndërkohë që rezultati përfundimtar i zgjedhjeve mbetet ende i pa shpallur, më shumë se një javë pas ditës së votimeve.
