Procesi i votimit në Elbasan ka sjellë një episod jo të zakontë që po bën xhiron e mediave sociale. Ndërsa mijëra qytetarë po shprehnin preferencat e tyre për partitë politike dhe kandidatët në garë, një votues ka vendosur t’i japë votën… klubit të futbollit Real Madrid!
Lajmi është konfirmuar nga gazetari Fatmir Popja, i cili raporton se në qendra të ndryshme votimi janë konstatuar fletë me mesazhe të pazakonta, ku qytetarët kanë shfrytëzuar hapësirën e votës për të shprehur mllefin e tyre ndaj klasës politike shqiptare.
Në një nga këto fletë, në vend të shenjës “X” për ndonjë kandidat, një qytetar ka shkruar: “Forca Real Madrid. Fitore.”
Nëse partitë politike janë në garë për të fituar zemrat e votuesve, mesa duket, në Elbasan të paktën, Real Madridi është një “kandidat” që nuk i zhgënjen tifozët e tij – as në kutitë e votimit.
