Mund të jenë thjesht thashetheme, por prej disa ditësh kanë filluar të shtohen informacionet dhe detajet që flasin për një ndarje të munshme mes Gerard Pique dhe Shakiras.
Një shembull i kësaj është artikulli i publikuar nga Emilio Pérez de Rozas në gazetën El Periódico , me titullin “A e keni lexuar këngën e fundit të Shakirës?” , ku gazetari veteran ofron disa hipoteza që sugjerojnë se marrëdhënia mes çiftit nuk po kalon aspak mirë.
Gazetari thekson se Piqué ka kaluar netë i vetëm në banesën e tij të vjetër.
“Gjithçka duket se tregon se marrëdhënia sentimentale, në çift, mes Shakirës dhe Piqué po kalon një nga momentet e saj më të këqija që kur u takuan në vitin 2010. Ka nga ata që kanë parë prej disa javësh kapitenin e Barçës duke jetuar sërish, duke kaluar netë e ditë, në banesën e tij të vjetër në rrugën Muntaner, ngjitur me Plaza Adrià”, shkruan Pérez.
Gjithashtu, gazetari ka vëzhguar profilin e Shakirës në rrjete sociale. Ai thekson se këngëtarja nuk ka publikuar foto prej muajsh me Piqué.
Më tej, ai shkruan se postimi i fundit i dyshes ka qenë që më 21 mars.
Pérez thekson se kënga e fundit e artistes mund të tregojë edhe si lidhja e saj me Piqué po shkon në këto momente.
Lidhur me gjithë këto aludime, deri më tani nuk ka asnjë reagim nga dyshja e njohur.
