Stenaldo ka folur ditën e sotme për një nga raportet më të sinqerta që arriti të krijonte gjatë qëndrimit të tij në shtëpinë më të famshme në Shqipëri.
I ftuar në emisionin “E Diell”, ai është ndalur posaçërisht te miqësia e veçantë me Malin, banorin e fundit të eliminuar nga gara, duke e cilësuar këtë lidhje si një nga surprizat më të bukura të gjithë këtij rrugëtimi televiziv.
Me tone shumë të sinqerta dhe emocionale, Stenaldo ka pranuar se një miqësi e tillë i kishte tejkaluar të gjitha pritshmëritë e tij.
Krijimi i raporteve të vërteta në një ambient aq konkurrues dhe nën presion të vazhdueshëm është një sfidë më vete.
“Me të thënë të drejtën, më shumë kisha menduar se do martohesha në Big Brother sesa do gjeja një shok si Mali”, tha ai.
Gjatë bisedës, ai tregoi se marrëdhënia mes tyre ka qenë e pastër që nga dita e parë. Ajo që e ka bërë Stenaldon të vlerësojë kaq shumë karakterin e Malit është fakti që ai ruajti identitetin e tij, duke mos rënë pre e lojërave apo strategjive.
Për të gjithë kuriozët që pyesnin nëse ky raport ishte vetëm për sa kohë ishin të izoluar nga bota e jashtme, Stenaldo konfirmoi se ata janë takuar menjëherë pas daljes së Malit nga formati.
“Jemi takuar, e kam pritur në studio ditën që doli, kemi folur dhe kemi shumë për të ndarë me njëri-tjetrin,” përfundoi ai, duke e bërë të qartë se kjo është një miqësi e vërtetë që do të vazhdojë të forcohet edhe larg syrit të kamerave.
