Një ngjarje e rëndë ka ndodhur mbrëmjen e së dielës në fshatin Majac të Podujevës, ku një 45-vjeçar nga Obiliqi dyshohet se është vrarë nga një 31-vjeçare.
Sipas informacioneve paraprake, të dy kanë qenë në një lidhje prej kohësh, por së fundmi marrëdhënia e tyre ishte përkeqësuar dhe po shkonte drejt ndarjes.
Dyshohet se Ardita Gashi e ka ftuar në banesën e saj Ilaz Brahim, ku më pas ka qëlluar me armë zjarri, duke e lënë të vdekur në vend.
Pas të shtënave, në vendngjarje ka mbërritur edhe një familjare e saj, Miradije Gashi, e cila është plagosur rëndë dhe, pavarësisht ndërhyrjes mjekësore, ka ndërruar jetë në spital.
Policia ka ndërhyrë menjëherë dhe ka vënë situatën nën kontroll, ndërsa e dyshuara është shoqëruar për trajtim mjekësor dhe ndodhet në gjendje të rëndë.
Me urdhër të Prokurorisë, rasti është riklasifikuar si “Vrasje e rëndë” dhe “Mbajtje e paautorizuar e armëve”. Hetimet për zbardhjen e plotë të ngjarjes po vazhdojnë.
