Diçka e pazakontë po ndodh në “Big Brother VIP Kosova”: publiku shqiptar – ai që shpesh i ka parë këto tema me rezervë, me paragjykime të trashëguara – këtë herë po sillet ndryshe nga çdo pritshmëri.
Për herë të parë, ata po krijojnë një “romancë” mes dy burrave… dhe askush nuk po e problematizon.
Bëhet fjalë për Londrimin dhe Klodin, dy banorë energjikë, plot humor dhe sharm. Fansat kanë filluar t’u montojnë video të stilit romantik: zemra, efekte dreamy, slow motion – si të ishte një çift i konfirmuar i reality show-t.
Edhe pse lidhja e tyre ekziston vetëm në imagjinatën kolektive, audienca po sillej sikur kjo histori të ishte e vërtetë.
Ajo që të habit është se askush nuk po hap diskutime mbi orientim, identitet apo etiketa. Nuk ka “po janë?”, “po s’janë?”, “po pse?”.
Publiku po sheh dy djem që komunikojnë natyrshëm, që vibrojnë mirë bashkë – dhe spontanisht po thonë: “Sa bukur do t’i shkonin njëri-tjetrit!”
Komentet e rrjeteve sociale janë nga më të çuditshmet e më entuziastet: “I dua bashkë”, “Uroj t’i shohim çift”, “Jam kaq i investuar në raportin e tyre”, “Ky është një fenomen kulturor”, “Po më ngroh zemrën kjo histori”.
Por ajo që duhet theksuar është fakti se as Londrimi dhe as Klodi nuk kanë shprehur interes romantik. Asnjëri nuk ka dhënë deklarata për orientimin e vet.
Pra, gjithë kjo është një roman kolektiv i publikut – një fantazi e përbashkët që po i bashkon njerëzit.
