Një tragjedi e rëndë ka ndodhur mesditën e sotme në Maliq, ku nënë e bir humbën jetën si pasojë e një zjarri, i cili dyshohet se nisi nga soba me dru që përdorej për ngrohje në banesë.
Ngjarja u regjistrua rreth orës 13:30, kur flakët përfshinë një banesë familjare ku ndodheshin nëna dhe dy fëmijët e saj. Zjarrfikëset dhe ambulancat mbërritën menjëherë në vendngjarje, por fatkeqësisht, pasojat ishin të rënda.
Sipas të dhënave paraprake, dyshohet se zjarri erdhi si pasojë e sobës me dru që familja përdorte për ngrohje. Si pasojë e flakëve dhe tymit të dendur, nëna Mejreme Azisllari, 40 vjeçe, dhe djali i saj, Luka Azisllari, 14 vjeç, humbën jetën nga asfiksia.
Fatkeqësisht, 14-vjeçari nuk arriti t’i mbijetonte plagëve të marra pas transportimit në spital. Vajza tjetër e familjes, 6-vjeçare, ndodhet aktualisht në spital në gjendje kritike.
Ky shkak i dyshuar, lidhur me ngrohjen me dru, tregon qartë rrezikun e madh që shkaktojnë këto mjete dhe njëkohësisht shton dhimbjen për dy jetët e humbura nga asfiksia.
