Rakip dhe Ervis Kurtaj, babë e bir që mbetën të plagosur gjatë atentatit në sallën e gjyqit ku u vra gjyqtari Astrit Kalaja, dolën nga Spitali i Traumës vetëm një ditë më pas.
Sipas raportimeve, gjendja e tyre shëndetësore është stabilizuar dhe nuk është më në rrezik për jetën.
Të plagosurit kanë dhënë tashmë dëshmitë e para para oficerëve të policisë gjyqësore, duke rrëfyer momentet dramatike që përjetuan në sallën numër 3 të Gjykatës së Apelit, një ambient i vogël ku gjithçka u përshpejtua.
Sipas deklaratave të tyre, tensioni u krijua menjëherë pas shpalljes së vendimit nga gjyqtari Kalaja, i cili, sipas Kurtajve, nuk u jepte favore kërkesave të familjes Shkambi.
Pas leximit të vendimit, Elvis Shkambi nxori një armë që e mbante poshtë xhaketës, e ngarkoi dhe qëlloi disa herë — në drejtim të gjyqtarit.
“Ngjarja ndodhi shumë shpejt. Kalaja u përpoq të mbrohej, por nuk kishte as hapësirë, as kohë,” thanë Rakip dhe Ervis.
Ata treguan se Elvisi iu afrua dhe qëlloi nga afër, duke i thënë gjyqtarit: “Vetë e kërkove.”
Më pas, sipas tyre, ai u kthye kah ata dhe sekretarja dhe vazhdoi të qëllojë, derisa arma mbeti pa plumba.
Pas të shtënave, autori i krimit u largua me qetësi nga salla. Të pranishmit përpiqeshin të shpëtonin gjyqtarin, por nuk gjetën shenja jete.
“U munduam ta ndihmonim, por ai nuk reagonte. Pas pak minutash erdhi policia dhe ambulanca. Kur dolëm jashtë, pamë që arma ishte lënë te dera, ishte shumë e vogël. Na erdhi shumë rëndë për gjyqtarin, por sinqerisht, kjo ishte një situatë që e kishim frikë prej kohësh,” thanë ata.
Sipas babë e bir, ata kishin marrë kërcënime të vazhdueshme nga familja Shkambi:
“Na thonin se do na hidhnin në rrugë, sa herë na shihnin. Ishte bërë si makth kjo histori.”
Kjo rrëfim ka theksuar edhe më shumë dimensionin e tensionuar të konfliktit që çoi në ngjarjen tragjike, duke denoncuar se frika dhe kërcënimet ishin pjesë e përditshmërisë për familjen Kurtaj.
