Kanë dalë pamje të reja nga aksidenti i rëndë i ndodhur në Fier, në Qafë të Koshovicës, ku një polic u tregua hero duke shpëtuar tre persona nga flakët.
Në videon e siguruar nga vendngjarja, shihet mjeti i përmbysur pas përplasjes së fortë me një pemë, ndërsa tymi dhe flakët kanë përfshirë makinën.
Polici, pa u menduar dy herë, ndihmon një nga të aksidentuarit, më pas kthehet për të nxjerrë edhe të tjerët, duke i larguar në një distancë të sigurt nga automjeti që po digjej.
Veprimi i tij i guximshëm ka marrë mirënjohjen e qytetarëve të pranishëm, të cilët e quajnë një akt heroik që i shpëtoi tre jetë nga një tragjedi e sigurt.
Ky moment tregon se në situata të rënda, humanizmi dhe guximi nuk njohin uniformë apo kufij – janë vlera që mbajnë gjallë shpresën te njeriu dhe forca e tij për të ndihmuar të tjerët, edhe kur rrezikon jetën e vet.
