Dikur një nga emrat më të pranishëm në mediat rozë, Seldi Qalliu ka qenë për një kohë të gjatë në qendër të vëmendjes, me lajme që nisnin nga muzika e deri te jeta e tij private.
Pothuajse çdo lëvizje e tij shndërrohej në titull, ndërsa prezenca e tij në rrjete sociale dhe në skenë ishte e vazhdueshme.
Por prej kohësh, Seldi është distancuar nga kjo vëmendje. Aktiviteti i tij në Instagram është minimal, me vetëm një apo dy postime në vit. Ai jeton tashmë në Shtetet e Bashkuara të Amerikës, ku duket se po zhvillon një kapitull të ri në jetën e tij.
Së fundmi, ai ka publikuar një këngë të re në platformën Spotify me titullin “Love Me”, një projekt në gjuhën angleze që shënon një largim të qartë nga stili i tij i dikurshëm.
Ende nuk dihet nëse ky është një fillim i qëllimshëm për të synuar tregun ndërkombëtar, por fakti që është rikthyer me muzikë pas një periudhe të gjatë heshtjeje, ka ngjallur interes.
