Pas ngjarjes së rëndë të ndodhur këtë të shtunë në fshatin Pocest të Maqellarës, ku një grua 50-vjeçare u plagos me thikë nga djali i saj, mediat kanë publikuar edhe fotografinë e autorit të dyshuar, Ikler Sula, 26 vjeç.
Ai akuzohet se ka sulmuar me thikë nënën e tij, Nexhmie Sula, gjatë një konflikti në banesë.
E plagosura është dërguar me urgjencë në Spitalin e Traumës në Tiranë dhe ndodhet nën kujdesin e mjekëve. Ajo është drejtoreshë e shkollës 9-vjeçare në Pocest.
Policia ka konfirmuar se i riu u arrestua menjëherë pas ngjarjes dhe ndaj tij janë referuar materialet në Prokurorinë e Dibrës. Mjeti i përdorur, një thikë kuzhine, është sekuestruar si provë materiale.
Sipas burimeve, 26-vjeçari kishte probleme të shëndetit mendor dhe ishte nën trajtim mjekësor prej tre vitesh.
Publikimi i fotos së tij ka sjellë reagime të shumta, duke shtuar vëmendjen mbi rastin dhe nxitur diskutime për gjendjen psikologjike të autorit dhe trajtimin e saj në kohë.
