Ka hyrë në fuqi ligji i ri Nr. 55/2025 “Për administrimin e bashkëpronësisë në ndërtesa”, i cili rregullon mënyrën se si menaxhohen hapësirat e përbashkëta në pallate.
Ligji u miratua më 3 korrik dhe është publikuar tashmë në Fletoren Zyrtare. Ai zëvendëson ligjin e vitit 2009, duke i dhënë fund një periudhe të gjatë paqartësish dhe konflikteve në bashkëjetesën kolektive.
Ndryshimi thelbësor është se çdo ndërtesë me më shumë se një pronar nuk mund të konsiderohet më si “pa zot”. Hapësirat e përbashkëta – si shkallët, ashensorët, tarracat, garazhet apo oborret – do të regjistrohen për herë të parë në Kadastër si pasuri në bashkëpronësi të të gjithë banorëve, duke shmangur abuzimet dhe konfliktet për pronësinë.
Ligji e konsideron bashkëpronësinë një marrëdhënie të detyrueshme ligjore dhe jo një çështje vullneti. Çdo pallat do të ketë një administrator të detyrueshëm, i cili mund të jetë një banor ose një subjekt i certifikuar nga bashkia.
Administratori do të jetë përgjegjës për mirëmbajtjen, pastrimin, riparimet, raportimin financiar dhe përfaqësimin ligjor të godinës. Ai do të nënshkruajë kontrata dhe do të mbledhë kuotat mujore të banorëve, me një mandat minimal trevjeçar.
Banorët janë të detyruar të marrin pjesë në mbledhjet e asamblesë së bashkëpronarëve, ku vendimet merren me shumicë votash dhe janë të detyrueshme për të gjithë. Ndër to përfshihen miratimi i buxhetit, projektet e riparimit apo shkarkimi i administratorit.
Ligji parashikon gjithashtu detyrime të qarta për ndërtuesit, të cilët janë përgjegjës për administrimin e godinës deri në momentin e kalimit të pronësisë te banorët. Ata janë të detyruar të përfshijnë në kontratat e shitjes rregulloren e administrimit dhe aktin e bashkëpronësisë, të cilat do të regjistrohen në Kadastër.
Një rol të veçantë marrin edhe bashkitë, të cilat do të certifikojnë administratorët, do të mbikëqyrin zbatimin e ligjit dhe do të kenë të drejtë të vendosin gjoba për shkelje që pengojnë mirëmbajtjen ose dëmtojnë bashkë.
