Pas një tërmeti me magnitudë 8.8 ballë në Gadishullin Kamchatka të Rusisë, autoritetet japoneze konfirmuan se valët e para të tsunami-t kanë goditur bregdetin verior të vendit.
Agjencia Meteorologjike e Japonisë njoftoi se lëkundja e fuqishme shkaktoi valë që prekën mbi 16 zona të bregdetit, me lartësi të regjistruara deri në 50 centimetra.
Rajoni më i prekur ishte Hokkaido, ku qytete si Nemuro, Kushiro dhe Ishinomaki u përballën me valë që u përplasën mbi portet dhe përmbytën disa zona përreth.
Pamje të transmetuara nga rrjetet japoneze, si NHK dhe TBS, tregojnë qartë momentin kur uji përparon drejt tokës, duke kaluar barrierat detare dhe duke mbuluar rrugë, makineri dhe struktura të vogla bregdetare.
Për shkak të rrezikut, autoritetet urdhëruan evakuimin e menjëhershëm të rreth dy milion banorëve në më shumë se 200 zona përgjatë bregdetit lindor dhe verior të Japonisë. Paralajmërimet për tsunami mbetën në fuqi për disa orë pas tërmetit, ndërsa situata u monitorua nga afër nga ekipet e emergjencës.
Deri më tani nuk raportohet për dëme të mëdha apo të lënduar, por autoritetet kanë kërkuar që banorët të mos kthehen në shtëpi pa një udhëzim të qartë. Janë pezulluar përkohësisht linja treni, tragete dhe operacione në porte në disa qytete të Hokkaidos, ndërsa inspektime të detajuara po kryhen në digat dhe strukturat mbrojtëse bregdetare.
Specialistët paralajmërojnë se pasgoditjet mund të vazhdojnë për ditë të tëra dhe rreziku nga valë të tjera nuk përjashtohet. Tërmeti që shkaktoi alarmet ndodhi në thellësi rreth 19 kilometra nënujorë pranë brigjeve lindore të Rusisë, dhe konsiderohet një nga më të fuqishmit në rajon në dekadat e fundit. Japonia, ndodhur përballë të njëjtit segment të unazës së zjarrit në Paqësor, mbetet ndër vendet më të ekspozuara ndaj rreziqeve sizmike dhe cunamive.
