Irini, një grua 82-vjeçare nga Tirana, është gjobitur me 10 mijë lekë nga Agjencia e Mbrojtjes së Konsumatorit, me pretendimin se ushqimi i maceve të rrugës po shkakton ndotje akustike.
Autoritetet bashkiake e kanë urdhëruar të largojë menjëherë kafshët nga zona ku jeton, por e moshuara nuk pranon t’i nënshtrohet vendimit.
Irini thotë se ka vite që kujdeset për macet, duke i ushqyer e strehuar në mënyrë vullnetare. Ajo e konsideron këtë si një akt dashurie dhe njerëzie, e jo si kundërvajtje.
Nëpërmjet avokates së saj, ka depozituar një padi në Gjykatën Administrative të Tiranës, duke kërkuar pezullimin e gjobës deri në shqyrtimin përfundimtar të çështjes.
Sipas mbrojtjes, nuk ekziston asnjë ligj që ndalon mbajtjen apo ushqimin e maceve, për sa kohë nuk shkaktohet ndotje reale apo dëm për komunitetin.
Gjykata ka hedhur shortin dhe ka nisur shqyrtimin e kërkesës për sigurimin e padisë në mënyrë të përshpejtuar.
Deri në një vendim të mëtejshëm, Irini vazhdon betejën për të mos hequr dorë nga kafshët që, sipas saj, janë e vetmja shoqëri që ka.
