Trajneri i Liverpoolit, Arne Slot, ka treguar bisedën e fundit që kishte pasur me Diogo Jotën, vetëm pak ditë para se futbollisti të humbiste jetën në një aksident tragjik rrugor në Spanjë.
Në një deklaratë të ndjerë, ai zbulon se kishte komunikuar me Jotën për ta uruar për fitoren në Nations League dhe për martesën me partneren e tij, Rute Cardoso.
“Herën e fundit që folëm, e urova për fitoren në Nations League dhe i urova fat për dasmën që po afronte. Në shumë mënyra, ishte një verë ëndrrash për Diogon dhe familjen e tij – dhe kjo e bën gjithçka akoma më zemërthyese që përfundoi kështu”, u shpreh trajneri.
Slot, që u emërua këtë sezon në krye të Liverpoolit, vuri në dukje se ndonëse nuk kishte punuar më parë me Diogon, që në fillim e kuptoi rëndësinë që ai kishte për klubin dhe për tifozët:
“Kur erdha për herë të parë në klub, një nga këngët e para që dëgjova ishte ajo që tifozët këndonin për Diogon. E kuptova menjëherë që ai kishte diçka të veçantë.”
Ai e përshkroi Jotën si një njeri të dashur për të gjithë në klub – një lojtar që nuk kërkonte vëmendje, por që e fitoi me sjelljen dhe përkushtimin e tij: “Ai nuk ishte thjesht lojtari ynë. Ishte një shok skuadre, një koleg, një mik, dhe një njeri që na bënte të gjithëve të ndiheshim më mirë.”
Në përfundim, Slot theksoi se klubi do ta kujtojë gjithmonë Jotën për më shumë se thjesht golat dhe paraqitjet në fushë: “Kur të vijë koha e duhur, do ta festojmë Diogo Jotën, do të kujtojmë golat e tij dhe do të këndojmë këngën e tij. Por tani për tani, do ta kujtojmë si një njeri unik dhe do të qajmë humbjen e tij. Ai nuk do të harrohet kurrë. Emri i tij është Diogo.”
