Një rast i rëndë ka tronditur opinionin publik në Florida, SHBA, pas vetëvrasjes së një djali 11-vjeçar, Louis Johnson III, i cili, sipas një padie të ngritur nga familja, ishte ngacmuar për muaj me radhë nga mësuesja e tij në shkollën fillore Legacy Elementary School në Marion County.
Sipas dokumenteve të padisë, mësuesja Donna White e quante Louis-in “budalla” përpara klasës dhe i inkurajonte nxënësit e tjerë të talleshin me të.
Ngacmimi, thuhet, ishte i vazhdueshëm dhe i njohur për stafin e shkollës, por sipas prindërve, asnjë masë nuk u mor pavarësisht ankesave të përsëritura.
Louis ndërmori një tentativë vetëvrasjeje dhe më vonë humbi jetën si pasojë e plagëve. Familja ka ngritur një padi për neglizhencë ndaj Bordit Shkollor të Marion County-t, duke i akuzuar për dështim në mbrojtjen e një fëmije të pambrojtur në mjedisin shkollor.
Avokatët e familjes deklarojnë se rasti është një shembull i qartë i dështimit sistematik të shkollave për të reaguar ndaj ngacmimeve që vijnë jo vetëm nga bashkëmoshatarët, por edhe nga vetë personeli arsimor.
