Presidenti amerikan Donald Trump ka refuzuar një plan të propozuar nga Izraeli për të vrarë liderin suprem të Iranit, Ajatollah Ali Khamenei, kanë bërë të ditur për ABC News dy zyrtarë amerikanë.
Sipas burimeve, Izraeli kishte ndarë me Shtetet e Bashkuara informacion se kishte një “dritare mundësie” për të goditur liderin më të lartë të Teheranit, por Trump nuk ishte dakord me këtë veprim.
Nuk është e qartë nëse ai e ka komunikuar refuzimin drejtpërdrejt me kryeministrin izraelit Benjamin Netanyahu.
Lajmi u raportua fillimisht nga Reuters dhe më pas u konfirmua nga burime të tjera mediatike.
I pyetur gjatë një interviste në “Fox News” për lajmin e Reuters, Netanyahu shmangu konfirmimin apo mohimin e informacionit:
“Ka shumë raportime të rreme për biseda që nuk kanë ndodhur kurrë dhe nuk do të hyj në këtë temë. Por mund t’ju them se ne bëjmë atë që duhet bërë, dhe Shtetet e Bashkuara e dinë çfarë është më e mira për to. Nuk kam ç’të shtoj më shumë.”
Shtëpia e Bardhë ka refuzuar të komentojë mbi raportimet.
