Forcat Ajrore të Shteteve të Bashkuara kanë dërguar në Arabinë Saudite avionin më të madh ushtarak në botë, një lëvizje që shihet si sinjal i qartë i përgatitjeve për përshkallëzim të mundshëm ndaj Iranit.
Sipas të dhënave të publikuara nga Flightradar24, avioni C-5M Super Galaxy u nis nga baza ajrore Aviano në Itali dhe mbërriti pranë kryeqytetit saudit, Riad, të enjten në mbrëmje.
Departamenti Amerikan i Mbrojtjes nuk pranoi të komentojë mbi këtë lëvizje, por mbërritja e një avioni të tillë, i aftë të transportojë tanke, helikopterë dhe mjete të rënda ushtarake, përkon me zhvillimet në rritje në Lindjen e Mesme, ku SHBA po shton praninë ajrore në rajon përmes avionëve F-16, F-22 dhe F-35.
Kjo lëvizje vjen në një moment kur presidenti Donald Trump po shqyrton nëse do të përfshijë SHBA-të në konfliktin midis Izraelit dhe Iranit.
Sipas Shtëpisë së Bardhë, Trump ka vendosur një afat prej dy javësh për të marrë vendimin përfundimtar.
“Duke marrë parasysh se ekziston një mundësi e konsiderueshme për negociata që mund ose jo të ndodhin në të ardhmen e afërt, presidenti do të vendosë brenda dy javëve nëse do të angazhohemi ushtarakisht”, deklaroi zëdhënësja Karoline Leavitt.
