Irani ka lëshuar një paralajmërim të drejtpërdrejtë ndaj Mbretërisë së Bashkuar, Francës dhe Shteteve të Bashkuara, duke deklaruar se çdo përfshirje e tyre në konfliktin me Izraelin do të sjellë goditje ndaj bazave ushtarake dhe anijeve të tyre.
Sipas agjencisë shtetërore iraniane Fars, një zyrtar i paidentifikuar është shprehur se sulmet ndaj Izraelit “do të vazhdojnë”, dhe se bazat amerikane në rajon janë objektiva të drejtpërdrejtë.
Kjo deklaratë vjen pas një vale sulmesh të Iranit ndaj Izraelit gjatë natës, ndërkohë që Tel Avivi u kundërpërgjigj duke goditur dhjetëra objektiva në territorin iranian, përfshirë pozicionet e mbrojtjes ajrore.
Sipas autoriteteve izraelite, të paktën tre persona janë vrarë dhe dhjetëra të tjerë janë plagosur. Operacioni “Rising Lion” i Izraelit ka synuar kryesisht objektiva bërthamorë në Iran, përfshirë dëmtimin e pjesshëm të qendrës kryesore të pasurimit në Natanz.
Ndërkohë, udhëheqësit perëndimorë kanë bërë thirrje për përmbajtje. Kryeministri britanik Sir Keir Starmer, presidenti francez Emmanuel Macron dhe kancelari gjerman Friedrich Merz kanë kërkuar uljen e tensioneve.
Presidenti amerikan Donald Trump u bëri thirrje autoriteteve në Teheran që të arrijnë një marrëveshje për programin bërthamor, duke paralajmëruar se “sulmet e Izraelit vetëm do të përshkallëzohen”.
SHBA mban baza të përhershme në shtete si Kuvajti, Katari, Bahrejni, Emiratet e Bashkuara Arabe, si dhe forca të dislokuara në Irak, Siri, Arabinë Saudite dhe Oman.
Britania, nga ana tjetër, është e angazhuar në tre operacione të mëdha ushtarake në rajon, përfshirë misionin detar Operation Kipion në Gjirin Persik, Detin Arabik dhe Oqeanin Indian.
Forcat ajrore britanike kanë prezencë të vazhdueshme në bazën e Qipros dhe veprojnë nga Al Udeid në Katar, Al Minhad në Emiratet e Bashkuara dhe Al Musannah në Oman. Marina Mbretërore mban katër anije të luftës kundër minave dhe një fregatë të klasit 23 në Bahrejn, si dhe një bazë tjetër në portin Duqm të Omanit.
Pas sulmeve të Izraelit të premten, ku u vranë dy shkencëtarë bërthamorë dhe tre komandantë të Gardës Revolucionare Islamike, Irani e akuzoi hapur SHBA-në si “sponsori kryesor” i Izraelit, duke e futur edhe atë në listën e objektivave të tij të mundshëm.
Sipas New York Times, Shtetet e Bashkuara pritet të dërgojnë avionë luftarakë shtesë në Lindjen e Mesme, çka tregon se Uashingtoni pret një përshkallëzim të mëtejshëm të konfliktit.
Britania ka deklaruar se nuk ka qenë e përfshirë në sulmet izraelite dhe se këto veprime janë kryer në mënyrë të njëanshme nga Tel Avivi. Ambasadorja izraelite në Londër, Tzipi Hotovely, ka pohuar se bisedimet e para me Londrën për këto operacione kanë ndodhur vetëm në mesditën e së premtes.
Ministri i Jashtëm britanik David Lammy zhvilloi një bisedë telefonike me homologun iranian pas sulmeve, duke apeluar për qetësi dhe duke paralajmëruar se rajoni po përballet me një “moment rreziku të thellë”.
