Irani ka lëshuar një tjetër paralajmërim të prerë për çdo palë të tretë që mendon të përfshihet në përshkallëzimin e konfliktit me Izraelin, duke kërcënuar me një përgjigje “të menjëhershme dhe të planifikuar”.
Në një deklaratë të publikuar pasditen e sotme, Këshilli i Lartë i Sigurisë Kombëtare të Iranit tha se “përballja me armikun do të vazhdojë derisa të paguhet kompensimi”, duke nënkuptuar se operacionet kundër Izraelit nuk janë drejt përfundimit.
Pa përmendur drejtpërdrejt Shtetet e Bashkuara apo ndonjë aleat të Izraelit, Irani theksoi: “Në rast të ndërhyrjes së një pale të tretë në këtë agresion, ata do të përballen menjëherë sipas një plani specifik.”
Paralajmërimi vjen në një kohë kur presidenti amerikan, Donald Trump, po shqyrton mundësinë e përfshirjes së drejtpërdrejtë ushtarake në konflikt, por deri më tani nuk ka marrë një vendim përfundimtar.
Sipas burimeve të CNN, Trump ka shqyrtuar skenarët e një sulmi të mundshëm, por po pret për të parë nëse Irani do të japë sinjale tërheqjeje nga programi i tij bërthamor.
Situata mbetet e tensionuar, ndërsa rritet rreziku i përshkallëzimit të konfliktit në një përballje të gjerë rajonale me pasoja të papërcaktuara.
