Lideri suprem i Iranit, Ajatollah Ali Khamenei, ka kërcënuar publikisht Shtetet e Bashkuara me sulme të drejtpërdrejta ndaj anijeve luftarake dhe trupave amerikane në rajon, nëse Donald Trump urdhëron goditje mbi bunkerët bërthamorë të regjimit iranian.
Deklarata e ashpër e Khameneit vjen në kulmin e përshkallëzimit më të rrezikshëm të viteve të fundit mes Iranit dhe Izraelit, me bombardime të ndërsjella që kanë hyrë tashmë në ditën e gjashtë të përplasjes.
Në një fjalim të transmetuar në televizionin shtetëror, Khamenei u zotua se “Irani nuk do të dorëzohet kurrë” përballë presioneve të jashtme dhe u bëri thirrje Shteteve të Bashkuara të qëndrojnë larg.
“Çdo përfshirje ushtarake e SHBA-së do të sjellë dëme të parikuperueshme për amerikanët”, paralajmëroi ai me tone të hapura lufte.
Nga ana tjetër, presidenti Donald Trump, në daljen e tij të parë publike pas një takimi emergjent në Shtëpinë e Bardhë, u shpreh në mënyrë të paqartë për vendimin përfundimtar mbi ndërhyrjen ushtarake:
“Mund ta bëj, mund të mos e bëj. Askush nuk e di çfarë do të bëj,” tha ai para gazetarëve në oborrin e Shtëpisë së Bardhë.
Trump konfirmoi gjithashtu se sipas informacioneve të tij, “Irani është tashmë totalisht i pambrojtur” pas sulmeve të njëpasnjëshme izraelite, të realizuara me armatime të avancuara të furnizuara nga SHBA.
Ndërkohë, edhe grupi militant Hezbollah në Liban ka paralajmëruar për ndëshkim të menjëhershëm ndaj interesave amerikane në rajon, në rast se Trump autorizon sulme mbi Iranin.
“Do të godasim trupat amerikane dhe mjetet e tyre detare,” thuhet në deklaratën e lëshuar nga krahut i armatosur i Hezbollahut.
